SOÑANDO GALICIA... CON MANUEL MARÍA

Queremos dar a noraboa ao colexio  ADR Castelao de Rianxo, gañador do Concurso Exposición sobre Manuel María que titularon:

"Soñando Galicia ... con Manuel María "

  Podedes ver o seu traballo na entrada do colexio.

AS ESCALEIRAS POÉTICAS

Unha das actividades que estamos a facer nesta celebración das Letras Galegas son as "Escaleiras poéticas"

O alumnado escolleu algunhas das estrofas das poesías de Manuel María e con elas decorou as escaleiras.  Agora subimos ás clases  recitándoas.

MANUEL MARÍA

Durante todo o mes imos homenaxear o noso idioma galego e os nosos autores e autoras que escriben no noso idioma.
Estamos a ler moito, na exposición do vestíbulo ou na biblioteca podedes atopar moitas lecturas moi, moi interesantes

O xoves tivemos un acercamento á figura e a obra de Manuel María.

Manuel María - Kizoa Editar Videos - Movie Maker

Partindo dos contos  que podemos atopar en distintas obras e sobre todo en "O bigote de Mimí" a compañía Lucecús fíxonos  unha aproximación moi divertida á figura de Manuel María, chea de contos, cancións,..

O MES DA POESÍA

Manuel María segue a ser o autor homenaxeado nos saúdos e despedidas poéticas.

O saúdo desta mañá foi co poema "O Sol" recitado por Luca e Sabela

 

Adriana e Noa recitaron "O meu burriño"

O MES DA POESÍA

Esta mañá foi toda unha sorpresa!
No fío musical da escola á hora da entrada e da saída, puidemos escoitar a gravación colectiva que fixeron as Nadarinas e Nadaríns (aula de 4 anos B) sobre o poema de Manuel María, O arco da vella (Os soños na gaiola, 1985)
Participou todo o grupo no recitado e Álvaro e Carlos axudaron a poñer o audio no equipo de son.

O MES DA POESÍA

O primeiro día foi unha sorpresa, hoxe xa estabamos todos esperando, e valeu a pena.

Ao comezo das clases, Rut e Diego recitaron a poesía de Manuel María "A Natureza"

A saída, foron Lucía e Samuel os que nos deleitaron co poema "Galicia" de Manuel María.

O MES DA POESÍA

 Comezamos o mes da poesía co recitado de poesías a través da megafonía do centro.

No saúdo da mañá, Uxía recitou o poema de Manuel María "O carro". 

 

 A saída Alba recitounos "Agua donde vas" de Federico García Lorca.

Que boa forma de comezar e despedir o día.

 

SAN VALENTÍN

Poemiña para namorar a unha rosa

A rosa rosiña                                                               

está na roseira

ben coloradiña

feliz e riseira !

A rosa rosada

de tanto lucir

a mesma alborada

a pode ferir.

A rosa rosiña

está no rosal:

ti queres ser miña,

rosiña lanzal ?  

A rosa rosada

de tanto mencer,

é tan delicada

que pode morrer !

Para rosa rosiña

fachenda de maio,

incluso é espiña

a flor dun salaio !

A rosa rosada

xa é miña amiga:

quedou namorada

con esta cantiga !

 

 

Manuel María

Obra poética completa

DÍA DA PAZ

O día 30 celebraremos o "Día da Paz".
Neste día reflexionaremos sobre o que significa esta celebración, na nosa casa, no colexio, na cidade , nos lugares en guerra,..
Manuel María escribiu esta "Oda á perfección deste mundo" estaría moi ben que fose unha realidade.

Que sorte e que alegría
 vivir neste mundo
tan ben feito,
tan xusto e tan feliz.

Neste mundo sen guerras,
sen bombas atómicas,
sen xenreiras,
sen odios,
sen asoballamentos,
sen inxustizas,
sen envexas,
sen explotadores
e explotados.

Neste mundo de comprensión,
de amor,
de axuda ao noso irmao.
Que marabilla vivir
neste mundo equilibrado,
ben mantido,
feliz e xeneroso
no que cada un,
esquecéndose de si mesmo,
se da enteiramente
aos semellantes!

Manuel María

"Odes nun tempo de paz e de alegría"

O CEIP Quintela de Moaña fixo unha selección de poemas pola paz moi interesante, votádelle unha ollada.
No mundo segue habendo diversos conflitos: Sahara, Siria...
No vestíbulo do centro podedes ver unha exposición sobre o conflicto do Sáhara.
Podedes ter maior información en: ACNUR, UNICEF